السبت، 10 نوفمبر 2012

وطنى الصغير :) ♥



رغم انى عمرى ماروحتك أيام الضرب المقدسة بس انت أقرب شارع لقلبى فى الدنيا ...و كنت عايشة فيك بكل ما أملكه 
أيامها ..كنت عندك بخيالى و عشت كل لحظة فى الأيام دى روحيا ..قلبى دايما كان فيك و روحى ماكانتش بتفارقك ..و 
دلوقتى لما بروحك بحس قلبى بيرقص رقص حزين بس بتبسط أوووى و نفسى أجى أعد فيك ع الأرض ..مكان دم حبايبى و 
أهلى اللى مشوفتهمش ...نفسى أرسم أى حاجة جميلة على حيطانك ..نفسى أعيش فيك ...نفسى أحي و أنحنى 
احتراما لكل بطل نزل فيك أيامها ...نفسى أبوس ايد كل أم شهيد و كل واحد عينه راحت عندك ..

                                  تحية خاصة لهذا البطل حامل العلم =)  

محمد محمود ......انت وطنى الصغير الجميل

محمد محمود ....انت بقيت حتة منى 

محمد محمود .....انت علمتنى ازاى انى أقدر أعيش فى مكان و أحس بالأمان فيه من غير ما أروحه ...
كل شبر فيك بيحكى قصة بطل أو بطلة
محمد محمود ...انت غيرت حاجة كبيرة جوايا مش قادرة أعرف ايه هى بس انت سبت بصمة على قلبى :')
تحية لكل حد نزل أيام محمد محمود ...كل اللى نزل هناك هما ناس بحبهم أوووى و بيحشونى و أنا عمرى ما شوفتهم :')
شكرا يا بيتى الصغير :'"))) ♥

الثلاثاء، 3 يوليو 2012

فى عشق الورد =)

الورد ده من أجمل الحاجات فى الحياة ، حاجة كده رائعة و جميلة و ممكن يقول أى حاجة احنا مش عارفين نقولها ، سبحان الله فعلا ..ربنا حاطط فى الورد ده قدرة على الوصف و الكلام غريبة ، لو حد زعلان منك و عايز تصالحه هاتله ورد بس و متتكلمش حتى بعدها =) هو هيقوم بالواجب و كمان لما حد بيبقى عيان بيجيبوله ورد ...عبقرى اللى اخترع الفكرة دى لأن فعلا الورد بيدى شحنة جمال للبنى أدم بمجرد انه يشوفه =) 

لو بصيت للوردة كده هتشوف معانى كتيييييير أوى خصوصا الورد اللى ألوانه مبهجة ....تحس فيه حياة كده و سعادة و الوردة و هى مفتحة تحس انها مشرقة على الحياة و بتتحدى أى حاجة وحشة و صعبة و مكملة رغم أى شىء .


لما تكون سعيد هات ورد عشان يشاركك سعادتك و يعبر عن احساسك بجماله و لو كنت حزين برضه هات ورد عشان يديك جرعة تفاؤل و يعلمك انك تتحدى الحياة بمجرد انك تبصله و لما تكون زهقان هات ورد عشان يكسر الملل بألوانه المبهجة ....من الأخر كده حاول تعيش زى الورد هتلاقى الحياة فعلا بمبى D= .


من أمنياتى انى يبقى عندى محل ورد و أشتغل منسقة زهور ... أنا فعلا بعشق الورد و بحس ان ربنا خلقه عشان يطبطب بيه على القلوب الحزينة بمجرد انهم يشوفوه =) 


استمتعوا مع الورد =)) 

السبت، 23 يونيو 2012

شوية ألوان =)

ليه حاسة ان الحياة دلوقتى فى عيون ناس كتير بقت رمادى ان ماكنتش سودة يعنى !!!

أكييد مش كل حاجة وحشة بس يمكن احنا بنركز على الحاجات اللى يتوجعنا و نفضل عايشين فيها يمكن لو حاولنا نتجاوزها الحياة تنور شوية !؟ 

ربنا خلقلتا الألوان و دى من أكبر النعم اللى فى الدنيا و كمان خلى عندنا ورد بألوان كتييير مبهجة و الشمس لونها فاتح و السما زرقة و حتى الليل لما بييجى و الدنيا بتضلم بيبقى فيه قمر منورها و نجوم حواليه بتساعده و بعديه بييجى النهار يعنى أكيد فى شىء يستحق الحياة !! 

احنا اللى نقدر نلون حياتنا و نحط عليها شوية ألوان مبهجة لما تبدأ تضلم و نخلق الألوان دى جوانا =) 

كل حاجة بتعتمد على نظرتك ليها يعنى مثلا فى حد ممكن يشوف الشمس مصدر للحر و السخونية و ممكن حد تانى يشوفها ان هى بتنور الكون بعد ليل طويل ...ممكن حد يشوف العصافير كائنات مزعجة و ممكن حد تانى يشوفها رمز للحرية و الانطلاق ....ممكن حد يشوف الابتلاء ده من غضب ربنا و ممكن حد تانى يشوفه تكفير ذنوب و انها فرص يقرب فيها لربنا ....و هكذا فى كل حاجة بقى =)

حاول تضيف شوية ألوان لحياتك و لأحلامك و تطرد اللون الرمادى من قلبك ...الحياة أقصر و أصغر من اننا نضيعها فى حزن و يأس ....و اوعى تفقد الأمل الا لما الشمس تبطل تشرق =) 


الاثنين، 28 مايو 2012

ارحل يا ضباب من القلوب .......


كتير مننا دلوقتى بقى الضباب هو اللى بيحكم حياته ........مش عارفة هعرف أشرح معنى الكلمة و لا لأ بس اللى حاسسها أو اللى شاف حد حاسس  بيها هو بس اللى هيفهمها ..


هو ايه سبب الضباب !!!!؟؟ حاجات كتييير , ممكن يكون ناتج عن احباط من الأحوال السياسية أو من مشاكل عائلية و اجتماعية أو تراكمات لكل ده بس تعددت الأسباب و النتيجة واحدة ...فى الأخر هو الحاكم .
فشلت فشل  ذريع فى انى أحول الضباب ده لصفاء مع الناس اللى حواليا أو يمكن محاولتش أصلا !! .
ناس كتيير دلوقتى هتلاقيهم بيتمنوا الموت ...على فكرة مش كلهم بيبقوا مكتئبين و مخنوقين ,هما بس بيبقوا شايفين فى الموت الحياة اللى هما بيتمنوها عشان عندهم ثقة ان ربنا أرحم الراحمين و سبحانه و تعالى هو الوحيد اللى حاسس بيهم , أحيانا تمنى الموت بيبقى نوع من الاستسلام و ان البنى أدم بيوصل لمرحلة انه مش قادر يعافر مع الدنيا أكتر من كده .


متلومش حد لو قالك أنا عايز أموت عشان بيبقى عنده أسبابه اللى على الأقل فى نظره مقنعة .
الحالة اللى أنا حاساها مسيطرة على كتير مننا هى "اللا شىء " لا هو مكتئب و لا مخنوق و لا كل الكلام ده بس الأكيد انه مش مرتاح و لا سعيد و للأسف دى أصبحت الحالة الطبيعية لناس كتير .


متى سيتحول الضباب الى صفاء ؟؟؟؟!! ماظنش انه هيتحول أبدا و هيفضل عايش مع كل واحد حاسس بيه لحد ما يروح لربنا , و لكن يبقى فى نفسى شىء من الأمل الطفيف اللى أتمنى انه يفضل معايا و ان شاء الله الضباب اللعين هيرحل من قلوب الناس اللى بحبها و اللى مبحبهاش =)). 


الورد بالنسبالى رمز الصفاء =) يا رب نقدر نعيش زى الورد

نصيحة بس للناس اللى مش عندها ضباب و مش فاهمين الرغى ده و حاسينه فبرجوكوا خليكوا كده على طول ..خليكوا مبتسمين من قلبكوا و سعداء و حسوا بالناس اللى حواليكوا و قربوا من ربنا أوووووى عشان الضباب مايجيش و لو موجود يروح =).

النور هييجى أكيييد =)

كتبت بتاريخ 20 فبراير 2012 

الجمعة، 27 أبريل 2012

لسة الشمس بتشرق =)


    • ربنا بيبعتلنا كل يوم رسالة و هى ان كل يوم الشمس بتطلع  .يعنى أكيد فى يوم لكل واحد فينا الشمس بتاعته هتطلع فيه و أحلامه هتحقق ..اوعى يوم تفقد الامل أو تيأس ..لما الشمس تبطل تتطلع ابقى افقده براحتك... تفائل و اتحدى أى حد بيحبطك ....علم على الدنيا و متخليهاش هى اللى تعلم عليك .